Васіль Пятровіч у сваёй творчасці шмат увагі прысвяціў творам народнага паэта Беларусі Якуба Коласа. У фондах музея Песняра захоўваюцца ілюстрацыі да кніг вершаў Якуба Коласа «З майго летапісу» (1967), «Вершы» (1972), партрэт Якуба Коласа, напісаны да 100-годдзя з нараджэння класіка беларускай літаратуры, а таксама 90 акварэльных ілюстрацый да паэмы «Новая зямля».
Сам Васіль Пятровіч успамінаў: «У юнацтве, у перапынках падчас касьбы з вясковымі мужыкамі, дэкламаваў ім “Новую зямлю” Коласа — ведаў усю на памяць. І не ўяўляў, што калісьці праілюструю гэты твор. Мне было за шэсцьдзесят, калі ўзяўся за гэтую працу, раней не мог — лічыў сябе ўнутрана непадрыхтаваным. За паўтара года ўдалося зрабіць больш за 90 ілюстрацый да паэмы. Дапамаглі ўспаміны дзяцінства, згадваў, як чытаў вяскоўцам урыўкі, як яны смяяліся, бо нейкія сюжэты былі знаёмыя і зразумелыя».
Працы Васіля Шаранговіча вылучаюцца разуменнем стылістыкі коласаўскай мовы, пашанай да герояў, любоўю да роднага краю і займаюць пачэснае месца ў гісторыі нацыянальнага выяўленчага мастацтва.
Выказваем шчырыя спачуванні родным і блізкім народнага мастака. Памяць пра Васіля Пятровіча застанецца ў нашых сэрцах.
У 2014 годзе да 75-годдзя Васіля Пятровіча і да 90-годдзя паэмы "Новая зямля" у выдавецтве "Мастацкая літаратура" пабачыла свет новае выданне паэмы з ілюстрацыямі творцы. Тады ж у Доме-музеі Якуба Коласа адбылася прэзентацыя выдання і ўрачыстае адкрыццё выстаўкі "Малюнкі родныя і з'явы..." з фондаў Дзяржаўнага літаратурна-мемарыяльнага музея Якуба Коласа з удзелам самога Васіля Пятровіча Шаранговіча.
Успомнім разам...