13 лютага адбылася ўрачыстая перадача аўтарскай скульптуры Максіма Пятруля Дзяржаўнаму літаратурна-мемарыяльнаму музею Якуба Коласа
У гэты ж дзень у Дзяржаўным літаратурна-мемарыяльным музеі Якуба Коласа пачала працу часовая экспазіцыя з фондаў музея “…Чаго варты стары Талаш?”, прымеркаваная да 90-годдзя выхаду з друку аповесці Якуба Коласа “Дрыгва” і 180-годдзя з дня нараджэння В. І. Талаша.
Часовая экспазіцыя “…Чаго варты стары Талаш?”, падрыхтаваная сумесна з Домам-музеем дзеда Талаша, Мемарыяльным музеем-майстэрняй Заіра Азгура, пазнаёміць наведвальнікаў з гісторыяй напісання і выдання твора, з візуальнымі інтэрпрэтацыямі твора і галоўнага героя і з асобай Васіля Ісакавіча Талаша.
Падчас прэзентацыі адбылася куратарская экскурсія па экспазіцыі, пачала працу тэматычная фотазона, а стварыць інтэрактыўнае паглыбленне ў часы дзеда Талаша дапамаглі ВГР “Нашчадкі”.
Шчыра запрашаем наведаць новую часовую экспазіцыю!